Plantun de Prouvènço

Pèr coumpara dos planto d'encò nostre

Triglochin maritima & Myosotis laxa

Triglochin maritima

Juncaginaceae

Nom en français : Troscart maritime.

Descripcioun :
Li triglouchin soun de planto de palun. Aquéu fai de rizoumo, ço que douno de coulounìo. Li fueio soun poupouso, e lis enflourejado (grapo) soun facho de noumbróusi flour (20 à 100) sènso bratèio. Es uno planto raro que trachis toujour pas trop liuen de la mar. Coumpara emé lou triglouchin-de-mar que ié sèmblo un pau, mai èi mai e trachis subretout en mountagno.

Usanço :
Li grano sarien bono grasihado.

Port : Erbo
Taio : 40 à 80 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Triglochin
Famiho : Juncaginaceae

Ordre : Alismatales

Coulour de la flour : Verdo
Petalo : 6
Ø (o loungour) flour : Pancaro entresigna
Flourido : Printèms

Sòu : Ca
Autour basso e auto : 0 à 200 m
Aparado : Noun
Remarco : Planto de coustiero

Liò : Palun - Prado - Mar
Estànci : Termoumediterran à Mesoumediterran
Couroulougi : Subrecousmoupoulito
Ref. sc. : Triglochin maritima L., 1753

Te-vese-e-t'ame(-fourro-bourro)

Myosotis laxa

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Nom en français : Myosotis gazonnant.

Descripcioun :
Aquéu te-vese-e-t'ame, pulèu rare, trachis en ribo de ribiero, dins li prado umido e li roubino de palun. Emé si péu contro li sepalo se destrìo dis aùtri Myosotis di flour pas trop grosso. Tambèn, i'a ges de bratèio dins l'enflourejado e lou "calice" crèis proun après la flourido.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").